بە ئامادەبوونی جێگری سەرۆکی یەکێتیی نیشتمانیی کوردستان، مەراسیمی دەستپێکردنی خولی پەرەپێدانی کاری حزبی بۆ لێپرسراوی سەرجەم لێپرسراوی کۆمیتەکانی یەکێتی لە ئەکادیمیای پەروەردە و پەرەپێدانی کادیرانی مەڵبەندی دیراساتی گشتی بەڕێوەچوو.

ئەمڕۆ 8/10/2026 لە ئەکادیمیای پەروەردە و پەرەپێدانی کادیرانی مەڵبەندی دیراساتی گشتی و بە ئامادەبوونی بەڕێز رەفعەت عەبدوڵڵا جێگری سەرۆکی یەکێتیی نیشتمانیی کوردستان و بەڕێزان د.یوسف گۆران لێپرسراوی مەڵبەندی دیراساتی گشتی و هەڤاڵ تەحسین نامیق لێپرسراوی ئەکادیمیای پەرەوەردە و پەرەپێدانی کادیران و لێپرسراوی بۆردەکان و مامۆستا و لێپرسراوانی کۆمیتەکان، مەراسیمی خولی پەرەپێدانی کاری حزبی بەڕێوەچوو.

لە سەرەتادا د.یوسف گۆران لێپرسراوی مەڵبەندی دیراساتی گشتی باسی لە ئامادەکاریی و گرنگی خولەکە بۆ لێپرسراوانی کۆمیتەکان کرد و وتی: ئەم خولە بە رەزامەندیی سەرۆکی یەکێتیی نیشتمانیی کوردستان و بە پشتیوانی بەڕێز جێگری سەرۆکی یەکێتی ماوەی چەند مانگێکە کاری بۆ دەکەین، کە بەتایبەت بۆ ئەرک و کارە هەمەلایەنەکانی لێپرسراوی کۆمیتەکان دیزاین کراوە. بەهیواین سەرجەم هەڤاڵانمان لە تەواوی کۆمیتەکانی هەرێمی کوردستان سودێکی زۆری لێ ببینن بۆ ئەوەی لە کاروباری ژیانی رێکخراوەیی و حزبیاندا رەنگ بداتەوە.

دواتر بەڕێز رەفعەت عەبدوڵڵا جێگری سەرۆکی یەکێتیی نیشتمانیی کوردستان، بە وردی باسی گرنگی خولەکە و گۆڕانکارییەکانی ئەم دواییەی ئۆرگانەکانی یەکێتی کرد و وتی: کردنەوەی خولی لەم جۆرە بۆ پەرەپێدانی توانای کادیرانمان گرنگی خۆی هەیە و ئومێد دەکەم کە هەر یەکێک لە ئێوە بتوانێت سودێکی زۆری لێ ببینێت.

هاوکات باسی لە گۆڕانکارییەکانی ئەم دواییەی ئۆرگانەکانی یەکێتی کرد وتی: پڕۆسەی گۆڕانکارییەکان لەناو سەرجەم ئۆرگانەکان بەباشی دەچێتە پێشەوە و دەرفەتێکی زۆریش دراوە بە گەنجان بۆ ئەوەی لەم گۆڕانکارییەدا رۆڵی خۆیان بگێڕن.

دوای تەواوبوونی وتەکانیشی، لە گفتوگۆیەکی کراوەدا هەڤاڵان رەفعەت عەبدوڵڵا و د.یوسف گۆران وەڵامی سەرجەم پرسیار و سەرنجی لێپرسراوی کۆمیتەکانیان دایەوە.

خولی پەرەپێدانی کاری حزبی یەکێکی ترە لەو خولانەی کە لە چوارچێوەی سیاسەت و ستراتیجی ئەکادیمیای پەروەردە و پەرەپێدانی کادیرانی مەڵبەندی دیراساتی گشتی بەرنامەیەکی تۆکمەی بۆ دانراوە و لە قۆناغی یەکەمدا سێ مانگ دەخایەنێت و لە یەککاتدا سەرجەم لێپرسراوی کۆمیتەکان لە خولەکەدا بەشداری پێدەکات.